Ailbhe Ní Ghearbhuigh – Three Poems

Ailbhe Niě GhAilbhe Ní Ghearbhuigh was born in Kerry. ‘Filleadh ar an gCathair’ was chosen as Ireland’s EU Presidency poem in 2013 and was shortlisted in 2015 for RTE’s ‘A Poem for Ireland’. Péacadh was published in 2008 and Tost agus Allagar will be published in 2016. http://www.ailbhenighearbhuigh.com


Suanchaint

Bhís ag caint aréir
a deir tú liom
is bíogaim.

Camchuairt eile
tugtha agat
ar ríocht na fo-chomhfheasa.

Púcaí an éada
ag monabhar
is ag tnáitheadh ar a chéile,

Sochraidí
is tubaistí
is míle uafás eile.

Feithidí an oilc
ag dordán
in ainriail na hoíche…

Corruair,
nuair is mise an bhean sí
ag fógairt sceimhle ar fud an tí,

dúisímid beirt
ar steillchrith,
an t-aer farainn íogair.


Maolteanga

Ní haon mháchail é an stadaireacht.
Is modh labhartha í.
– K. Satchidanandan

Bíonn na héanlaithe féin ag snagarsach
agus iad ag cantaireacht,
rud nár thuig múinteoir
a ghearr pionós
as gach fuíollshiolla
a d’éalaigh ó bhuachaill óg
dá ainneoin féin.

Níor thuig sí,
mar a thuigeamarna, leanaí,
gur mhúscail an saol
an oiread iontais ann
gurbh éigean, le teann sceidil,
é a scaoileadh de ruathar béil
d’fhonn an áilleacht a roinnt linn.

Ceiliúradh
an nádúir dhaonna
ag cur thar maoil
atá sa mhaolteanga,
agus ní maol atá sí
in aon chor, ach fliúirseach:
fialchaint.

Níos déanaí sa saol,
chuir an buachaill céanna spéis
sa mhachnamh tarchéimniúil,
agus anois
roinneann sé
sonas na beatha
sa chiúnas.


Manchu

Agus an teanga Manchu tite i léig sa tSín,
bunaíodh scoil
mar ar theagasc foghlaimeoirí
cainteoirí nódha.

“Iontaise bheo”
a fhógraítear
go mórálach
ar bhinn na scoile.

“Iontaise?”
arsa Zhao Langfeng,
cainteoir dúchais críonna,
“Muise…”

“Ní thuigtear mise!”

 

 

Aside | This entry was posted in News, Poetry. Bookmark the permalink.

One Response to Ailbhe Ní Ghearbhuigh – Three Poems

  1. Pingback: The Galway Review | Ailbhe Ní Ghearbhuigh

Comments are closed.